Жыл сайын С. Аманжолов атындағы ШҚУ-ға жүздеген «Алтын белгі» иегерлері оқуға тапсырады. Олардың ішінде Назарбаев зияткерлік мектептерінің түлектері, халықаралық олимпиадалар жүлдегерлері, шығармашылық байқаулардың жеңімпаздары, спорт шеберлері мен спорт шеберлігіне үміткерлер бар.

Көп мектеп түлектері ШҚУ-дың республикалық және халықаралық рейтингтердегі көрсеткішіне сүйенеді. Биыл ғана 11-сыныпты аяқтаған Жанзада Ержанованың айтуынша, университет жайлы бұрыннан жақсы таныс. Жоғары сыныпқа таяғанда-ақ оқуға қайда құжаттарын тапсыратынына сенімді болған. Жанзаданың сөзіне сенсек, университет мәртебесі студенттер бітіргеннен кейінгі жақсы қызметке орналасуларына әсер етеді. Мәселен, ШҚУ түлектерінің жұмысқа орналасу көрсеткіші 98% пайыз.

- Amanzholov University әлемнің 200-ден астам жоғары оқу орындарымен келісім жасасқан. Бұл дегеніміз әрбір студент  академиялық ұтқырлық аясында шетелде білім ала алады. Мен де бұл мүмкіндікті пайдаланғым келеді. Әрине, сапалы білім алып, жақсы тәжірибе жинағаннан кейін болашақта жұмыс табу да оңай. Меніңше, ШҚУ-да облысымыздың ең дарынды, белсенді жастары жиналған, - дейді талапкер Жанзада Ержанова.

Абитуриенттердің біріне жарқын студенттік өмір қызық болса, бірінің ғылыми әлеуетке қызығушылығы зор. Ал, талапкер Нұрсәуле Ақбанованың сөзіне құлақ ассақ, мектепте де белсенді бойжеткенге университет жастарының білімінен бөлек, шығармашылық бағыты ұнаған. Айта кетейік, Amanzholov University бірнеше жылдан бері аймақтық «Студенттер көктемі» байқауының бас жүлдесін иеленіп келеді.

Жетпіс жылдық тарихы бар ордада заманауи зертханалар мен түрлі орталықтар да жұмыс істейді. Студенттердің жоғары білім алып, ғылыммен айналысуларына барлық жағдай жасалған. Аймақтың үздік мектеп түлектерінің ШҚУ-ды таңдау себебінің бірі осында дейді, қабылдау комиссиясының мүшелері.