Керемет сезім, шоқ гүлдер мен ізгі тілектер! «Ertis» концерт залында әр студент үшін ең ерекше күн — бітіру кеші өтті. Ол дегеніміз, үлкен өмірге аяқ басу!  
Биылғы оқу жылында университетті 3000-нан аса білікті жас маман аяқтайды. Олардың ішінде 2177-сі бакалавриат бойынша, 682-сі магистратура, 244 түлек Жоғары колледжді тәмамдайды. 186 түлек үздік диплом иегерлері! 
Шараның салтанатты бөлімі симфониялық оркестрдің музыкалық сүйемелдеуімен басталды. Ырғақты, халық билері мен әуезді әндер, Amanzholov University-дің көпжылдық гимні қонақтарға өзіндік атмосфера сыйлады. Ресми бөлімде университет ректоры Мұхтар Төлеген атаулы күнмен құттықтап, ата-аналарға алғыс айтып, түлектерге ақ жол тіледі.

- Университет спортшыларды, ғылыми жобалар мен шығармашылық байқаулар жеңімпаздарын мақтан етеді. Бірнеше жыл қатарынан Amanzholov University жастары «Студенттік көктем» фестивалінің қалалық және облыстық кезеңдерінің жеңімпазы атанды. Университет өз тарихында 70 мыңнан аса түлек дайындады. Олар бүгінде түрлі салада еңбек етіп, ел дамуы жолында өз үлестерін қосуда. Қымбатты, бітіруші түлектер дипломдарыңыз құтты болсын! Сәттілік!, - деді Мұхтар Төлеген.

Университет өмірінде белсенді, үздік студенттер алғыс хаттармен марапатталды. Атап айтқанда, мәдени, ғылым және спорт бағыттарында ерекше көзге түскендер Нариман Қайырбеков, Карима Ибрагим, Гүлдана Аусадық, Аяулым Серікқазина,  Жандос Сағдоллин, Денис Уланов, Айбол Слямбеков, Николай Мрзагарайев, Артем Боровиков, Жарас Төкенов, Алихан Байтиков, Татьяна Федорова, Мадина Садықова, Анель Абзалбекова және Айзат Мырзахметов.

- Көп рахмет. Дәл осы оқу орынына түскенім үшін ешқашан өкінген емеспін. Университет ең мықты жастарды дайындайды. Қазірдің өзінде-ақ магистратураға құжаттар тапсырып жатырмын, - деді Нариман Қайырбеков.

Шара өте жоғары деңгейде болды. Әрдайым солай! Осынау мереке, ең жарқын өткен төрт жыл үшін рахмет! Білім ордамыз бізді жан-жақты ашты. Барша оқытушылар мен ректор Мұхтар Төлегенге жасаған қолдаулары үшін алғыс айтамын, - деді Айзат Қинаятова. 

Естеріңізге сала кетейік, Сәрсен Аманжолов атындағы Шығыс Қазақстан университеті - Қазақстанның жоғары оқу орындары арасында жоғары білім беруде көшбасшы. Білім берудің жоғары сапасы Ұлттық біліктілік тестілеуі нәтижелерімен расталады. Университеттің білім алушылары екі жыл қатарынан Қазақстанның жоғары оқу орындары арасында бірінші және көпсалалы жоғары оқу орындарының Ұлттық рейтингінде бесінші орын алады. Университет 2023 жылғы түлектерді бүгінгі айтулы күнмен құттықтайды. Сәт-сапар, жастар!

Фоторепортаж https://cloud.mail.ru/public/iYtQ/q4WL5eTAa