Қабанбай батыр атындағы әскери кафедра курсанттары күндерін Әскери жарғы бойынша ғана өткізбей, мерекелік шара да ұйымдастырды. Шараны университет студенттері Астана қаласының 25 жылдығына арнаған.

27943 әскери бөлімі полигонында запастағы офицерлер бағдарламасында оқитын 86 жас оқу жиынынан өтті. Әскери машықтарды іс жүзінде үйрету мақсатын көздеген практикалық жиында курсанттар командалық және әскери әдіс-тәсілдерді меңгеріп қана қоймай, мәдени шаралардан да тыс қалмады.

- Болашақ запастағы офицерлер өз өнерлерін ортаға салды. Әрине, жиында ең бастысы әскери өмір мен темірдей тәртіп. Дегенмен, мәдени, рухани дүниелерді де ұмытпаймыз. Өйткені, оның ішкі тәртіпке, тұлға ретінде дамуға маңызы зор. Бірнеше күнде курсанттар ант қабылдап, қолдарына әскери билеттерін алады. Ал, осы күндер олар үшін болашақта жылы естелік болып қалады, - дейді Қабанбай батыр атындағы әскери кафедра бастығы Александр Керенцев.

Концертте барлық студенттер атсалысты. Патриоттық әндер шырқап, рухтандыратын өлеңдер оқыды. Орынды әзілге де орын табылды. Кафедрада оқитын қыздар сахнаға шығып, әскери өмірге қатысты жайдарман әзілдерімен жиналғандардың көңілін көтерді.

- Практикалық жиын барлық талапқа сай. Шынымен әскерде қызмет етіп жатқандай әсер алдық. Ойын-сауық шаралар да ұйымдастырылады. Әскери атақ пен билет алуға мүмкіндік берген университетіме ризамын, - деді курсант Ақжан Бауыржанұлы.

Айта кетейік, Қабанбай батыр атындағы әскери кафедраның биылғы түлектері шілденің 16-сы күні әскери ант қабылдайды.