Сәрсен Аманжолов атындағы ШҚУ-да Иркутск мемлекеттік университетінің әлеуметтану ғылымдарының докторы, ғылыми жұмыс және халықаралық қызмет жөніндегі проректор Константин Григоричевтің үш күндік дәрісі өтті. Мақсаты – ғылыми-зерттеу қызметке деген қызығушылықты қалыптастыру және еңбек нарығында бәсекеге қабілеттілікті арттыруға ықпал ету.

Дәрістер әлеуметтік ғылымдар саласындағы өзекті пәнаралық бағыт – «Субурбанизацияның демографиялық процестерге әсері» нәтижелеріне арналды. Тыңдаушылар «Тарих» және «Халықаралық қатынастар» білім беру бағдарламаларының студенттері, магистранттар, докторанттар мен ЖОО оқытушылары болды.

- Бұл оқиға 2022 жылдың қазан айында жоғары оқу орындары арасындағы серіктестік туралы шартқа қол қойылғаннан кейін институционалдық сипатқа ие болған ЖОО-дар мен ғалымдар арасындағы көпжылдық ғылыми байланыстар нәтижесінде жүзеге асты. Іс-шараны ұйымдастыруға қолдау көрсеткені үшін университет басшылығына рахмет. Біздің серіктестігіміз  жоғары оқу орнының студенттеріне, магистранттары мен докторанттарына көп пайда әкелетініне сенімдіміз, - дейді «Алтайтану» ҒЗО қызметкері Элеонора Столярова.

Мұндай кездесулерді ұйымдастырушылардың айтуынша, спикердің мазмұнды баяндамасы мен көтерген тақырыптарының өзектілігі тыңдаушылар арасында асқан қызығушылық тудырды. Айта кетейік, Константин Григоричев - «Тарих» білім беру бағдарламасының докторанты Дидар Сейтжановтың ғылыми кеңесшісі.

«Алтайтану» ҒЗО