Ertis Concert концерт алаңы Amanzholov University-ге тағы да есіктерін айқара ашты. Бұл жолы Жоғары колледж түлектері мен магистрлерге дипломдарды табыстау салтанатты рәсімі өтті. 2023 жылы университетті салалық және ғылыми-педагогикалық бағытта 670 магистрант ал, Жоғары колледжді 240 түлек жеті білім беру бағдарламасы бойынша аяқтады. Оның ішінде 31-і үздік диплом иегерлері.

- Колледжде мамандар даярлау үшін білім беру қызметін жүргізудің лицензиялық талаптарына сәйкес келетін барлық жағдай жасалған. Біздің түлектер республикалық және халықаралық ғылыми-практикалық конференциялардың, түрлі байқаулар мен олимпиадалардың жүлдегерлері мен қатысушылары екенін мақтанышпен айтамын, - дейді Жоғары колледж директоры Бибигүл Төлегенова.

Жоғары оқу орнынан кейінгі білім беру бөлімінің басшысы Тана Абылайханованың айтуынша, биыл магистранттар екі дипломды оқу бағдарламалары бойынша Еуроодақ пен Оңтүстік-Шығыс Азия елдерінде қорғаудан сәтті өтті. Бұл университеттің алдыңғы қатарлы екенінің тағы бір дәлелі.

Ауқымды шара әсем музыкалық сүйемелдеуімен басталды. Ырғақты, халық билері мен әуезді әндер, Amanzholov University-дің көпжылдық гимні қонақтарға өзіндік атмосфера сыйлады. Сондай-ақ Ғылым және жоғары білім министрі Саясат Нұрбектің бейне құттықтауы жолданды.  

Өз кезегінде басқарма төрағасы-ректор үздік магистранттарды алғысхаттармен марапаттады. Бұл қатарда Ақпейіл Көкенқызы, Тоғжан Мұхамедәлі, Айя Биахметова, Әсел Қабитханова, Эльвира Жұмаева, Данияр Зайнелов, Любовь Зуева, Меруерт Башикова, Тыныштық Мұхамадиева, Мөлдір Қабибиева, Анара Қабиева, Жанерке Ботабаева, Жібекжан Сембинова, Гульфайрас Мусина, Тілеубек Далабаев, Дәулетбек Ағызам, Камила Абзелеева, Азамат Биахметов, Диана Мұханова, Айнұр Жамбұрбаева, Эльмира Зарипова және Асхат Құсайынов.

- Бакалаврды да, магистр дәрежесін де ШҚУ-да алғаныма өте қуаныштымын. Барлық білгенімді осы жерде үйрендім. 2023 жылдың барлық түлектері мен магистрлерін құттықтаймын! Бүгін алған дипломдарымыз мансап жолымыздың баспалдағына айналсын, - дейді магистр Данияр Зайнелов.

Сонымен қатар, «С.Аманжолов атындағы ШҚУ Жоғары колледждің үздік студенттерінің Алтын кітабына» Ануарбек Бақытжан, Никита Хорьков, Сәтжан Багошев, Екатерина Шевченко, Карина Әлібекова, Данияр Қадыров, Аяна Уалбек, Гаухар Зарлықхан және Әсем Қайсанованың есімдері енді.

- Нағыз маман атанғаныма сенер емеспін! Уақыт зымырап өте шықты. Бірнеше жылда оқу орыны маған жастығымның ең жылы сәттері мен жарқын күндерін сыйлады. Ректорға, барша оқытушыларға рахмет айтқым келеді, - дейді Екатерина Шевченко.

Amanzholov University-дің жеке үлгідегі дипломы түлектерге кәсіби мансап жолындағы тамаша бастама саналады. Статистикаға сәйкес, оқу орыны түлектерінің жұмысқа орналасу көрсеткіші 98%-ды құрайды.