С.Аманжолов атындағы Шығыс Қазақстан университеті студенттерінің жеткен жетістіктері – оқу орынының берген сапалы білімі мен оқытудың үздік әдістемесінің жемісі. Университет жастары білім ордасының беделін Өскеменнен тыс та көтеріп жүр.

Оған дәлел бола алатын «Мектепке дейінгі оқыту және тәрбиелеу» білім беру бағдарламасының екінші курс студенттерінің жеңісі. Бүгін басқарма төрағасы-ректор Мұхтар Төлеген студенттерді жеңістерімен құттықтап, марапаттады. Аталған мамандық білім алушылары Талдықорған қаласының Жетісу университетінде өткен Қазақстан Республикасы жоғары оқу орындары студенттері арасында «Мектепке дейінгі оқыту және тәрбиелеу» мамандығы бойынша ұйымдастырылған ХV республикалық пәндік олимпиадада үздік нәтижеге қол жеткізіп, бірінші орын иеленді.

Жеңімпаздардың айтуынша білім сайысы екі кезеңнен тұрды. Бірінші кезең «Таныстыру» болса, екіншісі тестілеу және сабақ беру әдістемесін көрсету. ШҚУ студенттері мұндай республикалық олимпиадаға алғаш рет қатысса да биік тұғырға көтерілді.

- Әрине, қарсы командалар осал болған жоқ. Әсіресе Алматы қаласынан келген Қазақ ұлттық қыздар педагогикалық университетінің командасы мен Астана қаласынан келген Еуразия Ұлттық университетінің студенттері лайықты бәсекелестік танытты. Дегенмен, барлық кезеңдерде біз ең жоғары ұпайлармен топ бастадық. Қысқа уақытта ғана дайындалсақ та жеңіс бұйырды, - дейді Аманжолов университеті командасының капитаны Балнұр Рамазанова.

Еске сала кетейік, Талдықорған қаласында болған олимпиада сәуір айының соңында өткен еді.