АлтМУ-да «Үлкен Алтай» ҰБО сарапшылары Қазақстан және Қырғызстан университеттерімен бірлесіп әзірлеген халықаралық магистрлік бағдарламалардың түлектеріне дипломдарды тапсыру рәсімі өтті. Қазақстандық серіктес жоғары оқу орындарының тізімінде С.Аманжолов атындағы ШҚУ да бар.

– С. Аманжолов атындағы Шығыс Қазақстан университеті бүгінде біріккен халықаралық білім беруді жүзеге асыру жөнінде Қазақстанда алдыңғы орындағы білім ордаларының бірі. Бұл жердегі ең маңызды шарт – «Үлкен Алтай» ҰБО-ның қос дипломды білім беру бағдарламасын іске асыру. Оқу барысында біздің магистрант өзінің кәсіби саласында жобалар орындап, өз құзыретін айтарлықтай арттырғанын атап өткім келеді, – дейді стратегиялық даму және ғылыми жұмыс жөніндегі проректор Ирина Ровнякова.

АлтМУ мен С.Аманжолов атындағы ШҚУ дипломдарын «Солтүстік және Орталық Азия өңірлерінің тұрақты дамуы үшін деректерді талдаудың цифрлық технологиялары» бағдарламасының түлегі Әділет Амангелдин алды. Магистрант оқу барысында Ардуино платформасы негізінде орта білім беру жүйесіне робототехника элементтерін енгізу арқылы IT-технологиялар саласындағы зияткерлік деңгей мен оқыту нәтижелерін арттыру ғылыми тақырыбымен айналысты.

Әділеттің айтуынша, бірлескен магистратураға түсуге бір уақытта екі диплом алу мүмкіндігі және АлтМУ туралы жақсы пікірлер түрткі болды.