2011 жылдан бері 28 маусым Бұқаралық ақпарат құралдары қызметкерлері күні болып аталып өтуде. Жыл сайынғы дәстүр бойынша С.Аманжолов атындағы ШҚУ басшылығы қалалық, облыстық және республикалық басылымдар өкілдерін кездесуге шақырып, оларға жасаған ынтымақтастықтары үшін өз ризашылықтарын білдірді.

Биыл Amanzholov University 16 тілшіні мейрам алдында марапаттады. Атап айтқанда, «Хабар» телеарнасының корреспонденті Вячеслав Ветлугин, «Евразия» арнасынан Зәуреш Бітімбаева, «Алтай» арнасынан Лейла Слямбекова мен Сая Жараскызы, «Казахстанская правда» газетінен Галина Вологодская, «Egemen»-нің меншікті тілшісі Мерей Қайнарұлы, «Деловой Казахстан» басылымынан Ольга Сизова, «Astana» арнасынан Ирина Якунина, «Qazaqstan» арнасынан Олжас Керейхан, «Хабар-24»-арнасынан Эльмира Ахметова мен Анель Есенбердина, облыстық «Дидар» газетінен Айжанат Иқсанова, «Менің өлкем» газетінен Талғатжан Мұхамадиев және Әділхан Есімханов, «Устинка» ақпараттық порталынан Виктор Скрипниченко және «Шығыс ақпарат» медиа-холдингінің маркетологы Гүлмира Альчимбаева.

- Бұл оқу орыны барлығымыз үшін ерекше. Өйткені Шығыстың мен деген талай журналистері осы университеттің түлектері. Әсіресе, мейрам алдында осындай көңіл-күй сыйлап жатқан ШҚУ-ға дән ризамыз. Сүйікті ордамыздың қалай өсіп, өркендеп келе жатқанын көріп келеміз. Әлі де алар асулар алда екеніне кәміл сенемін, - дейді журналист Ольга Сизова.

Ректор Мұхтар Төлеген құттықтау сөзінде «Журналистика – қуатты күшке ие. Қоғам өмірін онсыз көзге елестету мүмкін емес. Және оның маңызы күн сайын артып келеді» деп атап өтті.

- Бұл сала иелерінің мойынына артылған жүк ауыр, жауапкершілік зор екені көпке аян. Сіздерге тынымсыз кәсіптеріңізге деген адалдықтарыңыз, болып жатқан жаңалықтарды тұрғындарға жеткізіп, маңызды әлеуметтік міндеттерді шешуге зор үлес қосып келе жатқандарыңыз үшін зор алғысымды білдіремін! Шалқар шабыт, ұдайы шығармашылық ізденіс, жаңа идеялар мен жобалардың табысты жүзеге асуын тілеймін!, - деді басқарма төрағасы-ректор.

Кездесу соңында қонақтарға алғыс хаттар мен 50 мың теңге көлемінде сертификаттар табысталды.