26 маусым мен 8 шілде аралығында 27943 әскери бөлімі полигонында запастағы офицерлер бағдарламасында оқитын студенттермен оқу жиыны өтуде. Олардың жалпы саны 86 адам. Әскери машықтарды іс жүзінде үйрету мақсатын көздейтін жиында студенттер командалық және әскери әдіс-тәсілдерді меңгереді. Әсіресе, әскери дайындық курсында үйренген дағдыларды оқу атыс кездерінде, ұрыс машиналарын жүргізу және басқа да оқу-ұрыс тапсырмаларын орындау барысында жетілдіреді.

- Қауіпсіздік шараларын ескере отыра ату қаруларынан атыс жаттығулары және жаяу әскер ұрыс техникасы БМП-2 машинасын жүргізу практикалары ұйымдастырылған. Студенттер таңертең 6.30-да ұйқыдан тұрады. Одан кейін таңғы жаттығу, таңғы ас және практикалық сабақтар өтеді, - дейді Қабанбай батыр атындағы әскери кафедра өкілдері.

Студенттер әскери шатырларға орналастырылған. Оқу жиынының барлық қатысушыларына жеке ұйықтайтын сөмкелер, карематтар, ауыз су берілді. Сондай-ақ үш уақыт тамақтану ұйымдастырылған. Жеке гигиенаны сақтау үшін де қолайлы жағдай жасалған.

Айта кетейік, Қабанбай батыр атындағы әскери кафедра базасында запастағы сержанттар бағдарламасы бойынша 127 бозбала және 29 бойжеткен қабылдау жүзеге асады.