Университетте физика-математика ғылымдарының докторы, профессор Қанғужин Балтабек Есматұлымен ресми кездесу өтті. Әл-Фараби атындағы ҚазҰУ-дың айтулы ғалымы С.Аманжолов атындағы ШҚУ оқытушыларымен болған жүздесуде өзінің ғылым жолындағы тәжірибесімен бөлісіп, білім ордасының ғылыми әлеуетінен хабардар болды.

- Айта кетейін, жалпы университет ғылымын дамыту, ғалымдар санын арттыру жұмысы жақсы жолға қойылған. Мысалы, осыдан бірнеше жыл бұрын оқу орынымызда докторант саны тек жетеу болса, бүгінде олардың саны сексеннен асқан. Докторанттардың ғылыми жұмыстары нәтижелі болу үшін белгілі отандық және шетелдік ғалымдармен тығыз байланыс орнатылған, - деп атап өтті Басқарма төрағасы-ректор Мұхтар Төлеген.

Балтабек Есматұлы ШҚУ ұжымымен өткен жиында жоғары математиканы оқытудың көптеген мәселелеріне тоқталды. Университеттің математика кафедрасының қызметкерлерімен зерттеулерді талқылады. Және ең маңыздысы, оқу орынында болашақ докторанттарды дайындау жөнінде университет басшылығымен бірлесіп жоспарлар құрды.

Жиынға қатысушылардың айтуынша, математика - нақты ғылым. Мұнда әр бірлік, әр амал маңызды. Ал, бұл саланың білікті маманымен өткен бір сағаттың өзі ғылымға қызыққан адам үшін үлкен олжа.