С.Аманжолов атындағы Шығыс Қазақстан университетінің студенттері армрестлингтен өткен Азия чемпионатында топ жарды. Біріккен Араб Әмірліктерінің Дубай қаласында өткен сында оқу орнының білім алушылары Маргарита Шорманова, Николай Мрзагарайев, Руслан Байгукшинов өнер көрсетіп, ел даңқын асқақтатты. Оқу орынының үш білім алушысы да «Дене шынықтыру және спорт» білім беру бағдарламасының студенттері.

Жарыс қорытындысы бойынша 3-курс студенті Маргарита Шорманова 60 келі салмақ дәрежесінде оң қолда екінші орын иеленді. Ал, Николай Мрзагарайев 75 келіге дейін жастар арасында екі қолда да бірінші орын алды. Сондай-ақ, осы салмақта ересектер арасында сол қолда бірінші, 80 келіге дейінгі салмақта оң қолда екінші орынға тұрақтады. Тағы бір спортшымыз Руслан Байгукшинов та жеңіс тұғырынан көрінді. Ол, 70 келіде оң қолмен күресуде бірінші орын алып, осымен бес дүркін Азия чемпионы атанды. Сол қолмен күресте де жүлдесіз қалмай күміспен күптелді.

Сәуір айының соңы мен мамыр айының бірінші онкүндігі аралығында өткен Азия чемпионатында 15-тен аса елдің спортшылары бақ сынады. Олардың қатарында Өзбекстан, Қырғызстан, Жапония елінен келген мықтылар бар.