Екінші күн қатарынан С. Аманжолов атындағы ШҚУ табиғаттың жаңаруын, жаңа өмірлік циклдің басталуын атап өтуде. Бұл жолы Жайлау күні тоғызыншы корпуста тойланды. Осы корпуста студенттер мемлекеттік қызметтің, журналистика мамандығының қыр-сырымен танысады, шет тілдерін үйренеді.

Жоғары оқу орнының ректоры Мұхтар Төлеген жиналған қауымды мерекемен құттықтады. 

– Наурыз мерекесі – көктемгі жаңарудың, жаңа өмірдің, жаңа мүмкіндіктердің символы. Ол ырыс пен молшылық, махаббат пен достықтың мерекесі. Біздің университет үнемі Наурыз мейрамын барлық дәстүрлерді сақтай отырып, барынша ауқымды түрде атап өтеді. Күш бірлікте, достар. Осы мерекелік күндер  барлығымыздың жүректерімізді қуанышқа толтырсын. Мереке құтты болсын, – деді Мұхтар Төлеген. 

С. Аманжолов атындағы ШҚУ-дың Бизнес және құқық жоғары мектебі жиналғандарға хореографиялық нөмірлерді және театрландырылған қойылымдарды дайындады.

– Бұл біздің университет үшін тамаша күндер. Наурыз әрқашан халқымыз үшін басты мерекелердің бірі болды. Біз біргеміз, жүректеріміз жалындап тұр. Әрқашан да солай болсын! – атап өтті Бизнес және құқық жоғары мектебінің деканы Әсел Апышева.

Мерекелік шара барысында университет ректоры Мұхтар Төлеген қазақ халқының маңызды рәсімдерінің бірі тұсау кесуді өткізді. Жақында бір жасқа толған Асфендияр Хурметтің тұсауы кесілді. Оның әкесі – Жоғары колледж оқытушысы Жігер Хурмет, ал анасы – экономика, менеджмент және қаржы кафедрасының сениор-лекторы Қарлығаш Қонбаева.

Әдет-ғұрып бойынша, тұсауы кесілген баланың алдына түрлі заттар қойлады. Ол қайсысын таңдаса, сол салаға бет бұрады деп есептеледі. Кішкентай Асфендиярдың таңдауы домбыраға түсті.

Ары қарай кеш іс-шара қонақтарының қазақтың ұлттық тағамдарынан дәм татуымен, әңгіме-дүкен құруымен жалғасты.